لوگ دنیا میں ہیں سب آگ لگانے والے

لوگ دنیا میں ہیں سب آگ لگانے والے
ایک ہم ہی ہیں فقط آگ بجھانے والے
ہم تو ہر بات میں ہیں سب کو ہنسانے والے
رات بھر جاگ کے دنیا کو سلانے والے


آدمی ہم کو رلانے کو تلے ہیں لیکن
خود ہی رو دیتے ہیں وہ ہم کو رلانے والے
وہ چلے آج تو کل ہم بھی چلے جائیں گے
وہ گئے دن کو تو ہم رات کو جانے والے


تھی وہ کچھ داستاں ایسی کہ سنائی رو کر
ورنہ ہم تو نہیں کچھ رو کے سنانے والے
غوطہ زن پا ہی گئے گوہر مقصد ساقیؔ
خاک ملتے ہی رہے خاک اڑانے والے