لوگ ہر بات کو افسانہ بنا دیتے ہیں

لوگ ہر بات کو افسانہ بنا دیتے ہیں
ہوش مندوں کو بھی دیوانہ بنا دیتے ہیں
ذکر کرتے ہیں ترے حسن کا جس دم ہم لوگ
چاندنی رات کو افسانہ بنا دیتے ہیں


تیری مخمور نگاہوں سے ذرا سی پی کر
ہم تو ہر چیز کو مے خانہ بنا دیتے ہیں
کچھ تو پہلے ہی کیا عشق نے پاگل دل کو
اور کچھ لوگ بھی دیوانہ بنا دیتے ہیں


حسن کی شمع کو وہ کرتے ہیں ایسے روشن
عشق کو آتے ہی پروانہ بنا دیتے ہیں
ہم وہ مے خوار ہیں جو دیکھ کے تجھ کو ساقیؔ
میکدے کو بھی صنم خانہ بنا دیتے ہیں