لغت میں دیکھ پہلے پیار آتا ہے

لغت میں دیکھ پہلے پیار آتا ہے
پھر اس کے بعد ہی سنسار آتا ہے
سنوں میں جب کبھی دنیا کہیں پر بھی
تصور میں مرے بازار آتا ہے


ترس کیا ہے تمہیں کیسے پتہ ہوگا
تمہیں تو ت سے بس تلوار آتا ہے
گھروں میں بچوں کے ہاتھوں میں پہلی بار
کھلونا بن کے ہی ہتھیار آتا ہے


سنا ہے شور خالی پن کا میں نے بھی
مرے بھی گھر میں روز اخبار آتا ہے
نصاب اس کا زیادہ سہل ہے شاید
وہ ہر پیپر میں ہی تیار آتا ہے


کہو گے کیا کبھی کچھ اور بھی فانیؔ
یا تم کو صرف جی سرکار آتا ہے