مآل اہل زمیں بر سر زمیں آتا

مآل اہل زمیں بر سر زمیں آتا
جو بے یقین ہیں ان کو بھی پھر یقیں آتا
کہیں تو ہم بھی ٹھہرتے جو ہم نشینی کو
نکل کے خواب سے وہ یار دل نشیں آتا


وہ جب تلک نہیں آتا پکارتے رہتے
تو دیکھ لیتے کہ وہ کب تلک نہیں آتا
خیال آیا تو یہ بھی خیال آیا ہے
یہی خیال اگر روز اولیں آتا


چلو اب اس کی خوشی وہ جہاں بھی مل جائے
مزا تو جب تھا کہ ملنے کو وہ یہیں آتا
بس ایک بات ہماری سمجھ میں آتی ہے
سمجھ میں ورنہ ہماری بھی کچھ نہیں آتا