madrase ke azab ne mara
teacheron ke itab ne mara

patli patli to yaad kar li thin
ek moti kitab ne mara

imtihan ka shabab are tauba
imtihan ke shabab ne mara

khwab dekha tha pas hone ka
us mujhe jhute khwab ne mara

jitne aasan sawal aae the
un ke mushkil jawab ne mara

jis ko daddy bhi padh ke pas na hon
itne mushkil nisab ne mara

tum ko geometryi ne mara hai
mujh ko zalim hisab ne mara

fail hone ka raaz fash kiya
hae chashm-e-pur-ab ne mara

main ne mara shahab ko ek roz
aur mujh ko shahab ne mara