mahalle bhar mein shohrat ho gai hai
hamein un se mohabbat ho gai hai

unhen bhi ab bukhar aane laga hai
hamein bhi kuchh hararat ho gai hai

nazar aane lage hain din mein tare
ye kya do din mein haalat ho gai hai

hum un ke ishq mein latke hue hain
latakne mein mahaarat ho gai hai

nahin ab qafiya koi bacha hai
ghazal kahne mein diqqat ho gai hai

miyan 'masrur' rahiyega sanbhal kar
raqibon ki zamanat ho gai hai