mahfil ka nur marja-e-aghyar kaun hai
hum mein halak-e-tale-e-bedar kaun hai

hum apne sae se to bhadak kar alif hue
dekha nahin magar pas-e-diwar kaun hai

har lamhe ki kamar pe hai ek mahmil-e-sukut
logo batao qatil-e-guftar kaun hai

ghar ghar khile hain naz se suraj-mukhi ke phul
suraj ko phir bhi mane-e-didar kaun hai

patthar utha ke dard ka hira jo tod de
wo kaj-kulah banka tarah-dar kaun hai