mahfil tamam raat hi yun to saji rahi

mahfil tamam raat hi yun to saji rahi
lekin tumhaare ba'd tumhaari kami rahi
kitne hi log sath mein chalte the dur tak
rishton mein tah si dhul ki lekin jami rahi


pachhta raha hun aaj bhi apne gunah par
ek bar jhuk gai to ye gardan jhuki rahi
samjha rahe the chand sitare mujhe magar
mujh se hi meri jang musalsal chhidi rahi


meri nazar thi pak ye lahja bhi narm tha
jab tak mere mizaj mein shaistagi rahi
phirti thi meri zist kisi ki talash mein
jab tak mere wujud mein teri kami rahi