mahshar ki is ghaDi mein hamara koi to ho

mahshar ki is ghadi mein hamara koi to ho
ai raat ai firaq khudara koi to ho
ye bad-dua nahin magar is dil ka ham-nawa
koi to ho nasib ka mara koi to ho


tinka hai aashiyane ki kya khub yaadgar
achchha hai dubte ko sahaara koi to ho
sarkar hath panw to sab de gae jawab
is na-murad dil ka bhi chaara koi to ho


kya hijr kya visal wahi aashiqon ka haal
aakhir qarar mein bhi bechaara koi to ho
'rahil' gham ke baad khushi bhi mile magar
is bahr-e-be-karan ka kinara koi to ho