main apne jism mein kuchh is tarah se bikhra hun

main apne jism mein kuchh is tarah se bikhra hun
ki ye bhi kah nahin sakta main kaun hun kya hun
unhen khushi hai isi baat se ki zinda hun
main un ki daen hatheli ki ek rekha hun


main pi gaya hun kai aansuon ke sail-e-rawan
main apne dil ko samundar banae baitha hun
wo mere dost jo ek ek kar ke dur hue
main un ko aaj bhi apne qarib pata hun


muhit karne ki koshish fuzul hai mujh ko
nadi ka chhor nahin hun main bahta dariya hun
mujhi pe phenke hai patthar jo koi aata hai
ki jaise main teri khidki ka koi shisha hun