میں بدن کے ابد آباد کا باشندہ ہوں

میں بدن کے ابد آباد کا باشندہ ہوں
کل جو تھا آج بھی ہوں اور وہی آئندہ ہوں
بارش موت سے کھل اٹھتی ہے مٹی میری
اسی مٹی کے کرشمے کے سبب زندہ ہوں


عشق کی آگ نے گھر پھونک رکھا ہے میرا
اور اسی خاک لگی آگ میں تابندہ ہوں
جسم در جسم جو دریائے تسلسل ہے رواں
اسی دریائے تسلسل کا نمائندہ ہوں


موت کے ہاتھ پہ بیعت ہے ذرا سی یہ حیات
اپنی بیعت سے نہ خائف ہوں نہ شرمندہ ہوں
کائنات ایک بڑے ساز کا بے انت آہنگ
میں بھی چھوٹا سا اس آہنگ کا سازندہ ہوں


ایک اک بجھتی ہوئی آنکھ کو روشن کرنا
فرحت احساسؔ میں اک خواب کا کارندہ ہوں