main dubne laga tha ki be-sakhta khula
gumrahiyon ke dasht mein mujh par khuda khula

aahat hi koi chaunki na bab-e-sada khula
ye shahr-e-be-panah bhi sahra-numa khula

wo paikar-e-tilism bahut surkh-ru hua
us par lahu ke lams ka jab zaiqa khula

aankhen lagin to qurb ki khushbu jawan hui
jab raat thak ke soi to band-e-qaba khula

phir mere ird-gird hai tufan-e-sad-zawal
phir mujh mein intishaar ka daftar naya khula

do din mein ehtiyat ka nashsha utar gaya
hum jitna chahte the wo us se siwa khula