main wo daraKHt hun khata hai jo bhi phal mere

main wo darakht hun khata hai jo bhi phal mere
zarur mujh se ye kahta hai sath chal mere
ye kainat tasarruf mein thi rahe jab tak
nazar buland meri faisle atal mere


mujhe na dekh meri baat sun ki mujh se hain
kahin kahin mutasadim bhi kuchh 'amal mere
bacha hi kya hun main aawaz rah gaya hun faqat
chura ke rang to sab le gai ghazal mere


ye tab ki baat hai jab tum se rabta bhi na tha
abhi hue na the ash'ar mubtazal mere
ye khauf mujh ko udata hai waqt ke manind
ki baithne se na ho jaen panw shal mere


wo din the aur na jaane wo kaun se din the
tere baghair guzarte nahin the pal mere
kabhi milega kahin shahr-e-khwab se bahar
agar nahin to khayalon se bhi nikal mere


main kis tarah ka hun ye tu bata nahin sakta
magar ye tai hai ki hain yar be-badal mere
jala hun hijr ke sho'lon mein bar-ha ajmal
magar main 'ishq hun jate nahin hain bal mere