makan chehre dukan chehre
hamari basti ki jaan chehre

ujad naslon ke nauhagar hain
khizan-rasida jawan chehre

dhuan dhuan manzaron ka hissa
khayal khushbu guman chehre

riwayaton ke nuqush jin par
wo khandaron se makan chehre

koi tassur ho zindagi ka
karen khushi gham bayan chehre

koi nahin hai kisi se waqif
nagar mein sab be-nishan chehre

'hanif' qadren badal chuki hain
na dhund wo darmiyan chehre