maniye baat meri saz badalte rahiye

maniye baat meri saz badalte rahiye
kabhi lahja kabhi aawaz badalte rahiye
ek hi taur jo apnaya to phans jaenge
jaise haalat hon andaz badalte rahiye


shikwa-e-shumi-e-taqdir to nadani hai
aap tadbir se parwaz badalte rahiye
hai munasib yahi is duniya mein jine ke liye
dam ghute jis se wo dam-saz badalte rahiye


aa gae aap sanam-khane mein to yaad rahe
apne sajdon ke bhi andaz badalte rahiye
chahte hain ki ho izzat ka tahaffuz har dam
dost badle hain to phir raaz badalte rahiye


asr-e-hazir ka taqaza to yahi hai 'monis'
raaz ki baat hai ham-raaz badalte rahiye