manzilon ke baad dil us raaz ka mahram hua
dar-haqiqat wo khushi thi nam jis ka gham hua

pesh-e-aina sanwarne mein badal kar zawiye
tum ne jis aalam ko dekha ek alag aalam hua

un ke gesu hain zamane par mukammal tabsira
barha aarasta ho kar jahan barham hua

jazba-e-hamdardi-e-ulfat tera mashkur hun
jab kisi ki aankh bhigi mera daman nam hua

chashm-e-saqi se gira jata hai zarf-e-mai-kashan
tod den saghar jinhen ehsas-e-besh-o-kam hua

kitne khake the hayat-e-kaamran ke zehn mein
dil to is aalam mein bhi masrur tha jab gham hua

shor-e-tahsin-e-sukhan ki rau bahane aai thi
zeb-e-lab 'mani' ke man aanam ki man danam hua