marhale jis mein bahut hashr-nishan guzre hain
us rah-e-shauq se hum raqs-kunan guzre hain

jin maqamat-e-junun se tha guzarna mushkil
hum unhi se sifat-e-sail-e-rawan guzre hain

ye damakte hue zarraat pata dete hain
is taraf se wo kabhi nur-fishan guzre hain

jo bhi guzre hain teri yaad se ghafil rah kar
zindagi mein wahi lamhat garan guzre hain

tishnagi zauq-e-nazara ki wahi hai ki jo thi
yun nazar se kai rangin saman guzre hain

'mansha' apna hi jigar hai ki rah-e-zist se yun
be-hijabana ba-sad azm-e-jawan guzre hain