معصیت راہ کی دیوار ہوئی جاتی ہے

معصیت راہ کی دیوار ہوئی جاتی ہے
اب ڈگر اور بھی پر خار ہوئی جاتی ہے
وہ قناعت ہے طبیعت میں کہ وقت رخصت
اک نظر حاصل دیدار ہوئی جاتی ہے


کون ہے نغمہ سرا آج کہ روح مردہ
رقص کرتی ہے تو سرشار ہوئی جاتی ہے
عقل رقبہ ہے کہ آباد ہوا جاتا ہے
دل عمارت ہے کہ مسمار ہوئی جاتی ہے


دو رخے پن پہ ذرا ہونے لگا کیا مائل
اک حمیت ہے کہ بیدار ہوئی جاتی ہے
کیا ہوا تجھ کو مری ہمت دشوار پسند
ذمہ داری بھی گراں بار ہوئی جاتی ہے


کون سے در پہ پٹک آؤں سر نا اہلاں
خود پسندی بھی دل آزار ہوئی جاتی ہے
کل یہی ترک تعلق پہ مصر تھی ثاقبؔ
آج دیکھو یہی دلدار ہوئی جاتی ہے