مسخ الفاظ کو جیسے ہو معانی درکار

مسخ الفاظ کو جیسے ہو معانی درکار
میری روداد کو ہے ایک کہانی درکار
مجھ میں میں ہوں یا کوئی اور ہے شامل مجھ میں
اب مری ذات کو ہے کوئی نشانی درکار


کوئی پرچھائی ہٹائے کہ گرانی ہے بہت
جسم خستہ کو ہے اب نقل مکانی درکار
کیا عجب ہے کہ سمندر ہے جہاں آب حیات
تشنہ لب کو ہے اسی پانی میں پانی درکار


کچھ زیادہ ہی قریں ہے وہ چھری شہ رگ سے
اور رگ رگ میں لہو کو ہے روانی درکار
اس سے پہلے کہ کوئی خواب دھواں ہو جائے
چشم تر کو ہے مرے اشک فشانی درکار