mauj-e-dariya ki tarah raqs-kunan rahte hain
hum se mat puchhiye kis waqt kahan rahte hain

dil ki betabiyan mashuq naya chahti hain
us taraf chal ki jahan mah-rukhan rahte hain

sar-bulandi hai muqaddar se amal se hasil
han taaqub mein to kotah-qadan rahte hain

kash ho jae kabhi hum se koi kar durust
zindagi mein to bahut kar-e-ziyan rahte hain

hum ko patthar na samjhiye ki hain moti hum log
sab se chhup-chhup ke tah-e-ab-e-rawan rahte hain

jhuriyan jild pe aane se buzurgi kaisi
hum to andar ki hararat se jawan rahte hain