mausam-e-girya-e-sarshaar mein ro paDte hain

mausam-e-girya-e-sarshaar mein ro padte hain
khush-nigar kucha-e-aghyar mein ro padte hain
dard jab had se guzar jae to hum ahl-e-sukhan
muskuraate hue ash'ar mein ro padte hain


kitna be-arth hai ye aadmiyon ka jangal
log sad-raunaq-e-bazar mein ro padte hain
dhup mein jab nahin dikhte hain shajar udte parind
baith kar saya-e-diwar mein ro padte hain


khak ho jate hain kuchh phul chaman-zaron mein
aur kuchh tut ke gulzar mein ro padte hain
muntazir jis ke liye thi ye nazar salha-sal
us se milte hue be-kar mein ro padte hain


tang ho jati hai jab sari zamin aadam-zad
sar jhuka kar teri sarkar mein ro padte hain