موسم گریۂ سرشار میں رو پڑتے ہیں

موسم گریۂ سرشار میں رو پڑتے ہیں
خوش نگر کوچہ اغیار میں رو پڑتے ہیں
درد جب حد سے گزر جائے تو ہم اہل سخن
مسکراتے ہوئے اشعار میں رو پڑتے ہیں


کتنا بے ارتھ ہے یہ آدمیوں کا جنگل
لوگ صد رونق بازار میں رو پڑتے ہیں
دھوپ میں جب نہیں دکھتے ہیں شجر اڑتے پرند
بیٹھ کر سایۂ دیوار میں رو پڑتے ہیں


خاک ہو جاتے ہیں کچھ پھول چمن زاروں میں
اور کچھ ٹوٹ کے گلزار میں رو پڑتے ہیں
منتظر جس کے لیے تھی یہ نظر سالہا سال
اس سے ملتے ہوئے بے کار میں رو پڑتے ہیں


تنگ ہو جاتی ہے جب ساری زمیں آدم زاد
سر جھکا کر تری سرکار میں رو پڑتے ہیں