موت میرا اک ذرا سا کام کر

موت میرا اک ذرا سا کام کر
زندگی کی دھوپ میں کچھ شام کر
لے یہ چادر خود کشی کی خود پہ ڈال
زندگی کچھ دن ذرا آرام کر


لے کے آتا ہوں میں اپنی وحیٔ جسم
تو فراہم روح کا الہام کر
رخ ترقی کا پلٹ دے میرے جسم
ورنہ مر جائے گا خود کو خام کر


جسم پھر خود ہی قلندر بن گیا
روح کے دامن کو کچھ دن تھام کر
دھجیاں کر جا کے کعبے کا غلاف
دھجیوں کو جامۂ احرام کر


فرحت احساسؔ اپنی تیغ امن سے
فرحت اللہوں کا قتل عام کر