mera lab-e-KHamosh agar iltija kare

mera lab-e-khamosh agar iltija kare
shayad teri nigah-e-karam e'tina kare
allah zor-e-be-asari ka bhala kare
yaksan hai koi nala kare ya dua kare


dil e'timad-e-wada-e-sabr-azma kare
kaam apna teri shokhi-e-taqat-ruba kare
us ka shabab josh pe aae khuda kare
dil zindagi se hath utha kar dua kare


gar ho sake to itna shahid-e-jafa kare
tegh-e-nigah-e-yar ke haq mein dua kare
parwana daur-e-gard-e-bisat-e-umid ho
dar-parda shama-e-bazm-e-mohabbat jala kare


iza-kushi ka daur bahaar-e-hayat hai
dil apna gul-faroshi-e-dagh-e-jafa kare
kuchh ikhtiyar bhi hai jo majburiyan hain kuchh
is kashmakash mein kahiye to insan kya kare


pahunche ye arsh par bhi to parwa na ho unhen
kahiye to nala mera rasa ho ke kya kare
aah-e-falak-rasa se to kuchh bhi na ho saka
shayad ki kuchh bulandi-e-dast-e-dua kare


majburi-e-atam mein hai zor ikhtiyar ka
jo kaam mujh se ho na sake wo khuda kare
quran mein likha hai jo la-taqnatu sarih
zauq-e-nigah kahiye to kyunkar khata kare


kyon chheden shokhiyan dil-e-shorish-pasand ko
kyon baithe baithe koi qayamat bapa kare
phir dam mein phansunga ki main said-e-shauq hun
sayyaad mashq ke liye mujh ko riha kare


lab aashna-e-arzu-e-dil kabhi na ho
aur majra-e-ishq ka qissa hua kare
'bedil' jo mast ho khabar-e-fasl-e-gul se wo
dawa-e-parsai-e-be-sarfa kya kare