mera sar aap ke qadmon pe jhuka aaj ke din

mera sar aap ke qadmon pe jhuka aaj ke din
apni qismat pe mujhe naz hua aaj ke din
jhum kar kali ghata chha gai har chaar taraf
kis ne zulfon ko pareshan kiya aaj ke din


sara aalam hai mere dida-e-hairan ki misal
jalwa-gar kaun sar-e-bazm hua aaj ke din
nigah-e-shauq tere rukh se hatai na gai
dil mein ek dard naya aur utha aaj ke din


ho ke khud samne aamal ki purshish kya khub
apni hasti ka kise hosh raha aaj ke din
ho dil-o-jaan 'shamim' aap pe qurban sau bar
ek nigah-e-karam-o-lutf-o-ata aaj ke din