mera to koi sher kisi bahr mein nahin

mera to koi she'r kisi bahr mein nahin
jab tak har ek bahr meri lahr mein nahin
jaan-e-sukhan jo hai tere honthon ke shahd mein
aisi mithas aur kisi zahr mein nahin


sharminda kyon kare koi suraj ki aag ko
pita hun main sharab pa dopahr mein nahin
'ushshaq aao karte hain jashn-e-barahnagi
sab kaam par gae hain koi shahr mein nahin


ai nek ruh aa ki karen jism ke gunah
allah aaj kaifiyat-e-qahr mein nahin
'ehsas' laut aaiye aap apne dasht se
aisa hai kaun dasht jo is shahr mein nahin