میرا تو کوئی شعر کسی بحر میں نہیں

میرا تو کوئی شعر کسی بحر میں نہیں
جب تک ہر ایک بحر مری لہر میں نہیں
جان سخن جو ہے ترے ہونٹھوں کے شہد میں
ایسی مٹھاس اور کسی زہر میں نہیں


شرمندہ کیوں کرے کوئی سورج کی آگ کو
پیتا ہوں میں شراب پہ دوپہر میں نہیں
عشاق آؤ کرتے ہیں جشن برہنگی
سب کام پر گئے ہیں کوئی شہر میں نہیں


اے نیک روح آ کہ کریں جسم کے گناہ
اللہ آج کیفیت قہر میں نہیں
احساسؔ لوٹ آئیے آپ اپنے دشت سے
ایسا ہے کون دشت جو اس شہر میں نہیں