mere hijr ka tu ilaj kar koi hal bata mere saiyan

mere hijr ka tu 'ilaj kar koi hal bata mere saiyan
mere karb ki mere dard ki koi kar dawa mere saiyan
mujhe dekh ja mere chaaragar main teri nazar ka shikar hun
kahan kyon hua kahan kya hua na mujhe suna mere saiyan


zara hath rakh ke tu hath par meri dhadkanon ko qarar de
mujhe reza-reza samet kar tu gale laga mere saiyan
na bata mujhe ki zamane ne tujhe kaise mujh se juda kiya
tujhe 'ishq hai jo abhi talak mere pas aa mere saiyan


mere hausle ko tu dad de mere husn-e-zan pe tu jaan de
main yahi raha sada sochta tu hai be-khata mere saiyan
tere chaunkne se pata chala mera nam ab bhi 'aziz hai
mere zikr par jo jhuka hai ab zara sar utha mere saiyan


mujhe shauq-e-lutf se dekh kar na to kar ishaare fareb ke
yun palat palat ke na baat kar na yahan se ja mere saiyan