mere honTon pe meri aah-o-fughan hai jaanan

mere honton pe meri aah-o-fughan hai jaanan
log kahte hain badi talkh zaban hai jaanan
jaante hain ki mohabbat ka maraz hai mujh ko
puchh lete hain magar dard kahan hai jaanan


das lagte hain ye duniya ke sukhnawar tere
teri baaton ka wo andaz-e-bayan hai jaanan
kah ke patthar jise duniya ne laga di thokar
wo mera dil hai mohabbat ka makan hai jaanan


dard diwar pe mandir ki likhi chaupai
aah meri kisi masjid ki azan hai jaanan
kar ke ghayal mujhe masum bani baithi hai
teri aankhon pe jo palkon ki kaman hai jaanan


mere sine pe zara dast-e-hina rakh do tum
dil mein ab ishq ka khurshed jawan hai jaanan
kar li mahtab ne ye dekh ke raaten kali
tere honton pe jo ek til ka nishan hai jaanan


teri aankhon mein mere donon jahan baste hain
tere qadmon pe lagi khak mein jaan hai jaanan