mere junun-e-shauq ko itni si kaenat bas
kar-e-daraaz ke liye chhoti si ye hayat bas

kaisi hain aazmaishen kaisa ye imtihan hai
mere junun ke waste hijr ki ek raat bas

wo hai jamal-e-be-karan qaidi-e-rang hai nazar
dida-e-shauq dekh le aaina-e-sifat bas

sare jahan ki tohmaten lag chukin hum pe shahr mein
dije na ab safaiyan kije na hum se baat bas

hur-o-qusur-o-mai sabhi ahl-e-safa ke waste
mujrim-e-ishq ke liye wada-e-yak-najat bas