mere wahm-o-guman pe raat din chhai udasi hai
pahan kar khwahishon ka ye badan aai udasi hai

parinda jism ke pinjre mein aaya to bahut khush tha
magar us ne sahar se sham tak pai udasi hai

koi batlae ki ab kis tarah paun sukun-e-dil
mere is jism ke pinjre mein dar aai udasi hai

chaman be-rang afsurda kali har phul be-khushbu
bahaaron ki faza bhi is baras lai udasi hai

nazar aaya nahin mujh ko mera gul-rang chehra jab
kaha aaine ne hazrat ye tanhai udasi hai

har ek su shahr-e-dil-aram mein jashn-e-bahaaran tha
faza mere hi ghar aangan ki kahlai udasi hai

ghata chhate hi jaise dhup chhat jati hai aangan ki
tujhe aate zara dekha to sharmai udasi hai