meri dastan-e-ghazal ne ab mere gham sabhi ko bata diye
jo chhupa rahi thi main ab talak wahi raaz-e-dil lo dikha diye

bhala ghumti main kahan kahan liye zakhm-e-dil tere nam ke
mere ashk-e-chashm charagh ne tere sare khat hi jala diye

hai bahaar gum hai faza bhi chup hain chaman se dur wo titliyan
ki taraqqiyon ne dayar se wo hasin ganw mita diye

main to bantti rahi pothiyan jo likhin thin tere visal mein
ki udasiyon ke hisab mein tu ne kyon makan jala diye

kai bar soch ke yun laga mere hath mein tera hath hai
jo haqiqaton ke diye jale to mohabbaton ke bujha diye

kahin kho gai hai jo sans hi to dhadak ke dil ye kare bhi kya
kisi be-wafa ki 'kashish' ke gham rah-e-ba-wafa pe bhula diye