meri hayat ko yun paemal usne kiya

meri hayat ko yun paemal us ne kiya
ki mera dard se rishta bahaal us ne kiya
wo bewafai ko kar-e-kamal kahta tha
phir ek roz ye kar-e-kamal us ne kiya


shikar-e-hijr mujhe kar gaya wo ek pal mein
ki meri zist ke pal-pal ko sal us ne kiya
jawab koi bhi jab ban nahin saka us se
mere sawal pe ulta sawal us ne kiya


chhuri ko tez bahut tez kar ke laya wo
'ajib dhang se mera khayal us ne kiya
'umair' us se farawaniyan jo mangin to
judaiyon se mujhe mala-mal us ne kiya