meri khata sar-e-mahfil talash karta hai
bahana qatl ka qatil talash karta hai

chubho ke tanz ke neze hamari rag rag mein
wo shiddat-e-khalish-e-dil talash karta hai

chaman jala ke parindon ka kar ke qatl-e-am
wo naghma-ha-e-anadil talash karta hai

rumuz-e-naqd-o-nazar se jo aashna bhi nahin
ghazal mein naqs wo jahil talash karta hai

wo khun-e-hasrat-e-dil se nawaz kar aansu
lahu ka rang bhi shamil talash karta hai

mizha pe ijz ke tare liye hue 'hassan'
dar ek sajde ke qabil talash karta hai