میری پلکوں کی دہلیز پر اس طرح میرے اشکوں نہ تم جگمگاتے رہو

میری پلکوں کی دہلیز پر اس طرح میرے اشکوں نہ تم جگمگاتے رہو
کیفیت دل کی ظاہر کسی پر نہ ہو غم خوشی کی جھلک میں چھپاتے رہو
ڈگمگانے نہ دو حوصلوں کے قدم اپنی ہمت کا رکھنا ہے تم کو بھرم
بجلیاں آشیانہ جلاتی رہیں تم نیا آشیانہ بناتے رہو


کر دیں ویراں نہ یہ امن کی بستیاں بغض و نفرت کی یہ سر پھری آندھیاں
ان کو رکھنا ہے تم کو جو اوقات میں تم چراغ محبت جلاتے رہو
کیا خبر کیا ہیں ایسی بھی مجبوریاں بڑھ گئیں خونی رشتوں میں بھی دوریاں
دوستو یہ تقاضا ہے حالات کا دوریاں تم دلوں کی مٹاتے رہو


سر کٹے یا رہے اس کا غم نہ کرو ظلم کے سامنے تم کہیں نہ جھکو
جو غلط ہے تم اس کی مذمت کرو اور آواز حق بھی اٹھاتے رہو
جی لو خود کے لئے کچھ نہیں فائدہ زندگی کا ہے عالمؔ یہی قاعدہ
مقصد زندگی ہوگا حاصل تمہیں دوسروں کے سدا کام آتے رہو