ملنے والو رشتوں میں کیوں آتے ہو

ملنے والو رشتوں میں کیوں آتے ہو
ایسے ویسے کپڑوں میں کیوں آتے ہو
اپنے چہرے میں آؤ پہچانے جاؤ
ان کی ان کی شکلوں میں کیوں آتے ہو


ذات چھپانا خود کو دھوکا دینا ہے
کانٹے ہو تو پھولوں میں کیوں آتے ہو
سچے جذبوں دل میں سلگو شعر بنو
آنسو بن کر آنکھوں میں کیوں آتے ہو


پاگل غصو روح میں اترو پیار بنو
گالی بن کر باتوں میں کیوں آتے ہو
تم سے میرا کیا رشتہ ہے کچھ تو نہیں
تو پھر میرے خوابوں میں کیوں آتے ہو