miTe hain jaise hum ek shaKHs ki KHushi ke liye

mite hain jaise hum ek shakhs ki khushi ke liye
mita na hoga koi is tarah kisi ke liye
kabhi kisi ke bharose pe jang mat karna
koi kisi se ulajhta nahin kisi ke liye


wo faiz uthata raha meri sada-lauhi ka
fareb khata raha main khud-agahi ke liye
gulon ka khil ke bikharna to amr-e-lazim hai
duaen mang dilon ki shaguftagi ke liye


ye aur baat patangon ko khak hona pada
charagh hum ne jalae the raushni ke liye
phir us ke baad tumhaara suragh kho baitha
thahar gaya tha main raste mein do ghadi ke liye


ulajh gae hain khud apne hi masalon mein 'shakil'
chune gae the hum auron ki rahbari ke liye