mizaj apne kahan aaj hain thikane par
huzur aae hain mere gharib-khane par

pighal rahi hai musalsal jo barf aankhon se
ajib dhup hai palkon ke shamiyane par

na jaane aa gae kyun us ki aankh mein aansu
jo hans raha tha mere dard ke fasane par

zara si samt badal li jo apni marzi se
to naw aa gai tufan ke nishane par

khuda bacha ke rakhe 'mina' us ghadi se hamein
ki baat thahre kabhi us ke aazmane par