محبت بھی مصیبت ہو گئی کیا

محبت بھی مصیبت ہو گئی کیا
وفاداری غنیمت ہو گئی کیا
عدالت فرش مقتل دھو رہی ہے
اصولوں کی شہادت ہو گئی کیا


تمہارا تجربہ کیا ہے بتا دو
ہمیں تم سے محبت ہو گئی کیا
کتابت روکنے کا کیا سبب ہے
کہانی میں بغاوت ہو گئی کیا


مزار پیر سے آواز آئی
فقیری بادشاہت ہو گئی کیا
گھٹائیں دیکھنے کو آ رہی ہیں
ہماری چھت کی حالت ہو گئی کیا


یہ کیسا جشن ہے اس کی گلی میں
کوئی بندش اجازت ہو گئی کیا
نظر آتی تھی جو آنکھوں میں تیری
وہ بے چینی قناعت ہو گئی کیا