mubtala-e-hiras lagti hai
zindagi bad-hawas lagti hai

zindagi josh se bhari thi kabhi
ab to khali gilas lagti hai

kaisa guzra hai hadisa jaane
sari basti udas lagti hai

kis qadar bad-numa hai ye duniya
kis qadar khush-libas lagti hai

bhul jata hai tishnagi sab ki
jab samundar ko pyas lagti hai

garm nazron se dekhne wale
aag si dil ke pas lagti hai

jeb khali ho jab 'kamal-anwar'
das ki ginti pachas lagti hai