muD-muD ke kise dekhta tha koi nahin tha

mud-mud ke kise dekhta tha koi nahin tha
chhute hue logon mein mera koi nahin tha
ma'lum tha hain dastaken bachchon ki shararat
dar khol ke bhi dekh liya koi nahin tha


bekar hi darte the ki us hijr-makan mein
aaseb the aaseb-zada koi nahin tha
duniya thi tere gird tere pesh koi ho
mera to kahin tere siwa koi nahin tha


lauta hun tahi-dast jo bazar se main hi
wo yun ki kharidar-e-wafa koi nahin tha
main chahta hun dusri jaanib bhi koi ho
laut aai hai aawaz to kya koi nahin tha


taswir udasi ke har ek rang se bharpur
taswir mein ek teri jagah koi nahin tha