mujhe apni bazm-e-hayat mein abhi gham uThane ka shauq hai

mujhe apni bazm-e-hayat mein abhi gham uthane ka shauq hai
ye to us diwane ki baat hai jise dub jaane ka shauq hai
teri har nazar mein hain shokhiyan meri har nigah mein narmiyan
tujhe zakhm dene ki 'adaten mujhe zakhm khane ka shauq hai


mere dil pe girti hain bijliyan yun na muskura jo kaha gaya
tera ye jawab ki kya karun mujhe muskurane ka shauq hai
meri zindagi ki ye rit thi ki qadam qadam meri jit thi
main to jit jit ke thak chuka mujhe haar jaane ka shauq hai


mujhe masjidon mein na le chalo mujhe mandiron se alag rakho
abhi husn ke hi huzur mein mujhe sar jhukane ka shauq hai