mujhe jo dur se lagta tha aab ka dariya

mujhe jo dur se lagta tha aab ka dariya
gaya qarib to paya sarab ka dariya
kabhi sawab ke sahil se lag nahin sakti
wo naw jis ke liye hai azab ka dariya


ba-zahir aab-e-rawan ka jo ek khazana hai
haqiqatan hai wo dariya habab ka dariya
mutala ki jo wadi se ho ke bahta hai
wo hai meri nigah-e-intikhab ka dariya


parind-e-fikr ki parwaz jab hui hai buland
falak se arsh pe utra sahab ka dariya
haqiqaton ke jo sahil ko chhod kar bhatke
mila hai un ko tasawwur mein khwab ka dariya


sarab-e-dasht mein pyason ke waste 'nadim'
baha diya hai sakhawat ke aab ka dariya