مجھے سنبھالنے سے پیشتر وہ میرا تھا

مجھے سنبھالنے سے پیشتر وہ میرا تھا
یہ روگ پالنے سے پیشتر وہ میرا تھا
وہی خدا جو کہیں آسماں میں رہتا ہے
دعائیں ٹالنے سے پیشتر وہ میرا تھا


مجھے تلاش ہے اس نامراد سکے کی
جسے اچھالنے سے پیشتر وہ میرا تھا
مرے سوال اسے مجھ سے دور کرتے گئے
مرے کھنگالنے سے پیشتر وہ میرا تھا


تمام شہر اسے دیکھ دیکھ جیتا ہے
یہ زعم پالنے سے پیشتر وہ میرا تھا
اڑان بھرتے ہی پنچھی یہ بات بھول گیا
کہ پر نکالنے سے پیشتر وہ میرا تھا