mujhe udas kar gae ho khush raho
mere mizaj par gae ho khush raho

mere liye na ruk sake to kya hua
jahan kahin thahar gae ho khush raho

khushi hui hai aaj tum ko dekh kar
bahut nikhar sanwar gae ho khush raho

udas ho kisi ki bewafai par
wafa kahin to kar gae ho khush raho

gali mein aur log bhi the aashna
hamein salam kar gae ho khush raho

tumhein to meri dosti pe naz tha
isi se ab mukar gae ho khush raho

kisi ki zindagi bano ki bandagi
mere liye to mar gae ho khush raho