mumkin nahin khuda ke is inam ke baghair
hoti kahan hai shaeri ilham ke baghair

kuchh is tarah se zindagi us ne bayan ki
jaise ho baat meri mere nam ke baghair

hawi mohabbaton pe bhi khud-gharziyan huin
milta kisi se kaun hai ab kaam ke baghair

khelen bhi aag se rahen mahfuz hath bhi
aaghaz chahiye tumhein anjam ke baghair

kya qadr raushni ki andhera agar na ho
kya lutf den masarraten aalam ke baghair