مقدر کا اگر مقدور ہوتا

مقدر کا اگر مقدور ہوتا
غم الفت سے کوسوں دور ہوتا
مزاج عشق سے معمور ہوتا
تو شاید حسن بھی مجبور ہوتا


لطافت میں نہ اتنا چور ہوتا
تو چٹکی میں بتوں کے نور ہوتا
جو دل رکھنا تمہیں منظور ہوتا
نہ یوں افسانۂ منصور ہوتا


جو زہد ہوتا اگر دنیا میں لازم
تو عقبیٰ کا بھی یہ دستور ہوتا
کشش رکھتی اگر جلوؤں کی فطرت
بہ چشم منتظر کیوں طور ہوتا


نہ ہوتا بندگی پر کوئی مائل
اگر ہوتا جنوں بھرپور ہوتا
نہ اٹھتی آنکھ عشق خوش نشیں کی
نہ کوئی حسن پر مغرور ہوتا


جو دل ہو کر تمہارا شادؔ رہتا
تو نام عاشقی کافور ہوتا