na-bina gungi bahri wazarat pe aakh-thu
sau bar aaj-kal ki siyasat pe aakh-thu

bhuke hain ahl-e-ilm gadhe kha rahe hain khir
thu thu tere nizam-e-hukumat pe aakh-thu

ahl-e-sitam ki wah se hoti hai jo nasib
shohrat pe aisi aakh-thu rahat pe aakh-thu

tujh mein nahin tamiz halal-o-haram ki
lanat teri kamai pe daulat pe aakh-thu

rakhti hai jo nigah hamesha mafad par
aisi wafa pe aisi mohabbat pe aakh-thu

jo dagh-dar kar de ana ke libas ko
aise surur-o-kaif pe ishrat pe aakh-thu

dastar ka hai pas jinhen kar rahe hain wo
khairaat mein mili hui izzat pe aakh-thu