na haram ki mujh ko hai justuju na to rahguzar ki talash hai
jahan sar jhuka ke mile sukun usi sang-e-dar ki talash hai

mujhe bhejna hai payam-e-dil magar ek shart bhi hai meri
jo ye raaz raaz hi rakh sake usi nama-bar ki talash hai

jo tu ban sake mera aasra to ye hoga mujh pe karam tera
mujhe shah-rah-e-hayat mein kisi ham-safar ki talash hai

mile aisa baada-e-sarkhushi jo na khatm ho kabhi be-khudi
jo sanwar de meri zindagi usi ek nazar ki talash hai

yahi zindagi ki ada bhi hai meri kaenat-e-wafa bhi hai
tere gham pe naz hai is liye ki ye umr bhar ki talash hai

na dawa dua se gharaz mujhe na to jam-o-mai ki talab mujhe
jo ilaj-e-dard-e-jigar kare usi chaaragar ki talash hai

koi kah de 'akhtar'-e-na-tawan ki qafas mein hai mera aashiyan
jo chamak rahi hain ye bijliyan unhen mere ghar ki talash hai