nae jahan ka dar baz karne wali hai

nae jahan ka dar baz karne wali hai
ye ruh jism se parwaz karne wali hai
charagh bhi mere hathon mein aa ke khush hain bahut
hawa bhi mujh pe bahut naz karne wali hai


jo log jaante hain mujh ko wo samajhte hain
meri khamoshi bhi aawaz karne wali hai
wo aankh chup hai hamesha se phir bhi lagta hai
ki jaise ab sukhan aaghaz karne wali hai


hawa-e-sham ki karti thi ijtinab bahut
suna hai ab mujhe hamraaz karne wali hai
jo ek nahr guzarti hai shahr-e-dil se 'jamal'
kabhi wo khush kabhi naraaz karne wali hai